Tarabayennakto Latta koma
Tarabayennakto latta koma, Ama
Uray kaskan iti init a nagsubli iti ikut
Sikanto latta koma ti angin
A mangiturong kaniak aplaya a kaikariak
Bayabayennakto latta koma, Ama
Kadagiti sumabat kaniak a bagyo
Dimonto koma itulok a maisar-ongak
Kadagiti nasulinek nga aplaya
Nagsayaat ket ngatan, Ama
No kasinginka iti panagdaliasat
Ngem immun-unaka met naglugan barko
A nanglasat nadawel a taaw ti biag
Arig diak pay nakatengnga iti nagtengmo
Kayatko koma lintegem met ti danam
Ngem nagparangka iti parparmatak
A diakon gandaten a suroten ti nagdalanam
Ala, surotek ti balakadmo, Ama
Ngem tarabayennakto latta koma…
Taib, Birhinia ken Biag ti Tao
Kinunam idi agsangsangota iti paraangan
Kaykayasam idi taib- birhinia a panggedam
“Daytoy a taib kasla biag
Saan a napintas ti sukogna
No di a nalaing ti nangsukog
Maka-ipas ken makasalugsog
No saan a nasayaat ti pannakakayasna”
”Ti birhinia maidasig maputar a lagip
Agrissay no saan a napintas ti taib
Pagasutenna sennaay ni agtataib
Tumanabutob pay ti ‘sal-it’
Dagiti birhinia, maubon iti taib
Ti biag buklen dagiti lagip
Ket adda iti tao
No ania’t pillienna a t\udok
A mangubon kadagiti lagip
Adda iti tao no agpasalugsog
Wenno agpa-ipas iti taib”
Kadaydi a balikasmo, Ama
Pinilik ti kapintasan a taib ti biag
Idi umun-una, napintas ti panangubonko
Ngem nasalugsuganak, arig diakon kayat ti agtaib
Nasakit, naut-ot dagiti pinarnuayna a sugat
Ket naamirisko nga uray napintas ti taib
No saan a naannad ni tao nga agtaib
Umagibas latta umukuok kaunggan a leddaang…
Gawgaw-atekon ti Langit
Imbalakad daydi amak,
Ikarigatak kano a gaw-aten ti langit
Ket urnongek dagiti bituen
A mangsilaw, mangiturong kaniak
Iti dalan balligi ken ragsak
Innayonna pay,
Nga uray rigatmi amin a rigat
Diakto gandaten agbatay,
Kadagiti torre dagiti sulisog
Ketdi tumayabak a mangaramat
Kadaydi payyak nga insagutna kaniak
Kinunana pay,
A dandaniakton iti langit
Diakto lipaten tumangad ken agdumog
Tumangadak tapno agkararagak
Agdumogak tapno tumulongak
Iti panagitukitko kadagidi a balakadna
Nagaw-atko ti langit
Ket kanayonak a tumangad Kenkuana
Ken agdumog para kadagiti agkasapulan…
Sika’t Pakabuklan ti Plumak
Adda latta panaglumen dagiti bituen
Ngem pulos a dikanto mapunas
Biagekto latta dagidi lagip
A sinangalmo bayat kaaddam dennami.
Inggat pidit-pidit ti isemmo
Idi ibagak a sinerrekko
Lubong kurditan ni Samtoy
Awan man balikas a simngaw,
Ita bibig a nagtagilaon balbalakad
Ammok a maragsakanka para kaniak…
Wen, ama, iti kaawanmo
Nagtutuon plumak a nangimalditak,
Kadagiti immapay a leddaang
Ken panagtaldiapko bulong dagidi kalman…
Wen, sika’t pakabuklan ti plumak
Tumbog man bubon iti rupak
Ragsakko a lagalagaen dagiti balikas
A mangikur-it kadagidi lagip
Nga isu laengen ti nabati
Nangpalanto dagidi binulong dagiti kalman….
